政情：今日你上鏡：梁錦松 譚志源當年今日
基本法推廣督導委員會前日舉辦普選行政長官研討會，搵咗前財政司司長梁錦松以金融專家身份致詞，同場仲有「政改三人組」之一嘅政制及內地事務局局長譚志源（Raymond）。原本阿松坐喺台上，Raymond坐台下，未有企埋一齊。但中間休息時段後，兩人就一齊步進會場，令人回想十年前兩人並肩作戰嘅畫面。
當年Raymond係阿松嘅新聞秘書，因為工作經常出雙入對，當時Raymond身材比較瘦削，但依家就發福咗好多，反而阿松就變化不大。阿松自○三年因為偷步買車而引咎辭職後，重返商界打滾至今，而Raymond就獲當時嘅政制及內地事務局局長林瑞麟收留，之後扶搖直上做到局長，真係十年人事幾番新！
