政情：律師會一哥買「黃牛」專家
做得專業人士，通常都要花好多時間考取專業資格及接受培訓，平時工作又忙，做運動都可以話係奢侈活動。不過，上任律師會會長已有一年嘅林新強（Ambrose），就係其中一個例外。佢除咗熱愛網球，多年來仲為律師會引入廿三個唔同種類嘅興趣小組，確係「周身刀、張張利」。其實佢仲有把「刀」好利，就係買「黃牛」波飛好有心得，但係咁咪變相助長咗啲人炒「黃牛」？
為該會創23個興趣小組
Ambrose喺○四年加入律師會，由理事做到依家會長一職，「年資」差不多有十年，其中最為自豪嘅一項政策，就係○五年起創立興趣小組，至今總共成立咗二十三個小組，其中十三個係體育活動。佢話，每個小組都有自己嘅「身影」，皆因全部都係佢發起嘅！有關體育小組包括主流嘅足球、籃球、排球、網球、游泳等，甚至連扒龍舟都有。唔知今年端午節龍舟競渡，會唔會見到律師會參賽呢？
講到Ambrose最愛嘅網球運動，自不然講起唔少「波經」。原來佢同一班網球發燒友喺○六年成立咗「朗豪網球會」，做埋榮譽會長，約有一百人定期打波聯誼。除咗落手落腳打波，Ambrose都有鋪睇波癮，○八年曾經組團去上海睇男子網球年終賽（Masters Cup），可以現場睇世界排名前列分子如拿度、祖高域及費達拿等打波，話唔定可以偷到師。
變相助長違法炒賣波飛
不過，撲波飛一啲都唔簡單，身為律師會會長嘅Ambrose，就坦言自己有買「黃牛」飛睇波，仲分享「秘訣」添！佢話去得多睇波，就會留意到邊啲黃牛黨係「貨真價實」，唔會買錯貨，否則去到門口入唔到，咁就喊都無謂喇。佢又話，有啲人趁開波後先買飛，因為票價會即時下跌，價錢抵好多，話佢唔係買「黃牛」波飛老手都冇人信啦！不過，好多地方炒「黃牛」波飛都係違法，就算買「黃牛」波飛唔違法，但助長啲人炒「黃牛」飛係咪冇咁好呢？