香港一向有購物天堂美譽，商品齊全，價廉物美，服務一流，各適其適，備受各地旅客好評。上世紀末美國總統克林頓訪問中國時，仲專程帶夫人來香港血拼，結果滿載而歸。可惜時移勢易，隨着香港整體競爭力不斷下降，購物天堂亦逐漸褪色，已經今非昔比囉！
點解會搞成咁？講起真係一匹布咁長。購物天堂之所以褪色，其中一個原因係日本及澳洲等地嘅匯率近年大幅下跌，加上退稅機制，唔少國際名牌貨品價格仲平過零關稅嘅香港，就算新加坡嘅匯率冇乜大上落，好多名牌貨退稅後亦比香港便宜，吸引唔少港人山長水遠跑到外地掃貨。以一款國際名牌經典乾濕褸為例，香港零售價接近兩萬港元，澳洲定價雖然差唔多，但旅客可享百分之九退稅，扣除稅款後比香港平一千七百元，你都咪話唔吸引。
其實，除咗匯率因素之外，香港物價愈來愈貴，更主要嘅原因相信同租金不斷上漲有關。呢，早前有份研究報告顯示，香港去年第四季繼續成為全球最貴舖租地區，平均呎租達二千八百零一元，比排名第二嘅美國紐約貴三成，比排第三及第四嘅法國巴黎及英國倫敦分別貴兩倍添。原來，所謂嘅「紐倫港」就係咁解喇。更令人嘆為觀止嘅係，日前銅鑼灣波斯富街有個只有二百呎嘅地舖，居然以一億八千萬元售出，呎價達九十萬元，成為全球最貴新舖王。正所謂，羊毛出在羊身上，商舖售價及租金不斷飆升，營商成本水漲船高，物價又點可能唔愈來愈貴吖。
當然喇，相對於營商成本上升，黑店劏客以及社會愈來愈政治化，對購物天堂嘅負面影響可能仲大吖。近年內地旅客不斷增加，為香港帶來唔少商機，本來係好事，可惜好事變壞事，內地旅客過多而引發唔少問題及亂象，導致中港矛盾愈演愈烈，有人乘機搞事，一時驅蝗，一時拖篋，嘈喧巴閉，永無寧日。香港人為淵驅魚，自毀根基，遲早連內地旅客都避而遠之，到時購物天堂想唔收檔都幾難咯。
正如古人話齋，無可奈何花落去。香港經過一百幾年嘅努力，先至由小漁村發展成金融中心同購物天堂，可惜回歸後不斷沉淪，金融中心固然大為失色，購物天堂更加搖搖欲墜，講起真係可悲。今時今日，世界各地正千方百計吸引旅客，連內地城市亦爭相發展自貿區，唯獨香港不思進取，一味食老本，再咁落去，你話仲食得幾耐吖？購物天堂變成旅遊地獄，動感之都淪為動亂之城，呢個可能就係香港嘅最後歸宿啩！