每當香港有重大議題討論，末代港督彭定康（肥彭）總會透過不同渠道高調說三道四，佢日內更會以牛津大學校監身份訪問香港，出席香港海事博物館同英國牛津大學博德利圖書館合作名為《針路藍縷︰牛津大學珍藏明代海圖及外銷瓷》特別展覽開幕禮。肥彭今次不遲不早，趁香港為期五個月政改諮詢剩餘一個多月之際訪港，想說三道四干預本港政改之意圖昭然若揭。
政圈有傳肥彭今次訪港長達五日，除咗明日出席展覽開幕禮，據聞也會出席香港牛津校友會研討會。其實肥彭高調談及香港事務非首次，最近一次係去年十一月，佢接受《華爾街日報》訪問時話，香港依家唯一缺乏就係選出自己政府嘅權利，認為任何抵抗國際潮流拒絕給予人民普選權嘅行為，都只會「逆風吐口水、白費氣力」（spitting in the wind）。
肥彭上次喺政改諮詢未開始前已經說三道四，今次選擇政改諮詢如火如荼期間直接前來香港，有機會開腔勢必會加多兩錢肉緊，話佢唔係存心「攪局」都冇人信啦！