政情：警示威演習 長毛冇眼睇
一連四場嘅政改早餐會尋日正式喺政府總部開餐，期間突然有十多名示威者現身政府總部對出嘅公民廣場，高舉「抗議選擇性檢控」、「釋放胡佳」等橫額及巨型「路福西」公仔等示威道具，部分人更激動喝罵在場警員，另有警員在旁攝錄整個示威情況。睇真啲，原來成個「示威」都係警方自編自導嘅一場戲，示威者係由臨時演員（臨記）扮演，演習用作警方內部教材，畀警員學吓點樣應對示威者挑釁。
「同現實差好遠」
現場所見，今次示威演習嘅像真度幾高，導演一聲令下，班臨記示威者隨即高叫「收信」，又有專人負責喝罵警員，挑戰警員嘅忍耐力。不過，班臨記始終唔係示威常客，嗌口號時冇嚟火氣，難怪經常示威嘅立法會議員梁國雄（長毛）行過睇見呢場戲，都即時擰晒頭，話同現實差好遠喎。咁又係，現實中嘅長毛示威邊有咁和諧淨係叫警員「收信」吖！唔怪得班臨記嗌到中午都未收得工喇。