政情：立會慳電議員自動發光
立法會自從搬咗去添馬艦新大樓之後，就事事講求環保，唔係推行「無紙化」，就係改用自動感應系統慳電，但最搞笑係有議員慳上癮，建議將辦公室自動感應照明系統嘅着燈時間由十分鐘縮短至五分鐘，咁就更加慳電費嘞。不過，其實早已有議員投訴個感應系統，話為咗令系統感應到有人喺辦公室，搞到做做吓嘢都要彈起身做體操。如果再縮短時間，豈不是每五分鐘就要起身做一次運動？
卿姐仲想減至5分鐘
立法會近年推出唔少環保措施，好似以電郵發放文件同剪報、非繁忙時間停用部分升降機及使用自動感應照明系統等，淨係呢啲環保措施都幫立法會慳咗唔少資源。不過，據聞議員劉慧卿仍然嫌未夠慳，為咗更加環保、慳多啲電費，卿姐就建議將議員辦公室照明系統嘅亮燈時間，由依家嘅十分鐘縮短至五分鐘，如果五分鐘內感應唔到有人郁動，咁就會自動熄燈，唔使嘥電。
不過，聞說進出口界議員黃定光就唔多贊成，因為依家議員喺辦公室坐定定專心工作時，照明系統就感應唔到有人大幅度郁動而自動熄燈，搞到辦公室會突然漆黑一片。所以議員每隔十分鐘就要停低手頭工作，起身揈揈手、踱踱步，如果真係縮短着燈感應時間，議員就要每五分鐘起身「做運動」，咁樣真係夠晒健康，唔知算係好定唔好嘞。
增聘手語傳譯要再拖
另外，講到立法會來年預計可以節省嘅開支，其中一樣就係手語傳譯服務。原本秘書處打算喺立法會大會、內務委員會、財務委員會同其他事務委員會分階段推行手語傳譯，但由於手語傳譯鬧「人才荒」，有關機構冇辦法提供足夠人手，所以手語傳譯服務擴展到事務委員會嘅大計就要延遲一年，等有關機構培訓到足夠人手再算。
至於普通話傳譯服務方面，立法會就已搵到機構提供服務，但就要同相關機構商量培訓事宜，畀班傳譯員上「政治通識」堂，等班傳譯員唔使聽到議員花名都唔知講緊邊個喎。