中環出更：發叔緊張飯堂多過組黨
新界鄉議局講組黨已經有兩個月，但似乎仍未有聲氣。不過講到食喇喎，就進展神速。鄉議局尋日開執委會會議，主席劉皇發就問其他執委，有關喺大樓內搞飯堂嘅進度如何，點知原來未有餐廳搞手肯進駐該局。點知發叔一錘定音話，如果冇人嚟，局方就免收租半年，吸引啲人嚟試業，起碼大家閒時可以去飲杯咖啡喎！鄉議局一個月先至開一次大會，人又少，唔知邊個肯去開呢？
「鄉局非人人爭氣」
講番組黨，發叔話局方有人才同錢財，所以組黨唔成問題，但點去整合力量就唔係三言兩語可以成事，如果太過積極，又誓神劈願咁話組黨，組唔成咪盞大家丟架，而且局內又唔係人人都咁爭氣喎。嘩，唔知發叔講緊邊個唔爭氣呢？雖然組黨未成，但局方都通過撥備一百萬元畀新成立嘅選舉事務委員會，計劃吓點樣幫村民登記做選民。
發叔會後仲講笑話，組黨與否就好似女人婚嫁咁，可以嫁、可以終生不嫁，又可以永遠都同人拍拖，而佢就較偏愛同人拍拖喎。綜合發叔會內外嘅說話，似乎意有所指咁，唔知係咪暗示緊有人對組黨過分熱心，但又冇能力去組黨呢？
卓妮