違規大招牌 屋署懶取締
違規大型招牌遍鬧市，屋宇署被轟「踢極唔郁」！黃小姐早前途經旺角，發現上海街與亞皆老街交界有唐樓外牆被掛上大型招牌，懷疑屬違規設置，「咁長嘅招牌上面再加個細牌，仲要整多盞燈喺上面，見到都牙煙，萬一冧咗落嚟就真係大件事！屋宇署又話致力取締違規招牌，原來得個講字！」
發信勸喻 自行糾正
屋宇署發言人證實，有關招牌屬現存違例招牌，但強調並無明顯危險及影響樓宇結構，亦不屬須優先取締類別，該署暫時不擬採取執法行動。不過，發言人又稱，該署已於今年一月向該招牌擁有人發信勸喻，要求盡快自行安排糾正工程。
「違例就係違例，屋宇署咁都話唔使即時取締，有冇再懶啲？」黃小姐不滿屋宇署執法過於寬鬆，有漠視市民安全之嫌，要求作出檢討。