頭痛醫頭，腳痛醫腳，港府施政特色從來係馬虎甩漏，顧此失彼，往往令人唔知好嬲定好笑。呢嗱，以「殺街令」清除噪音就係其中一個典型例子嘞。
係咁嘅，旺角行人專用區近年變身街頭表演專用區，強勁音樂加上小販擺賣及商業推廣活動嘅嘈雜聲，簡直交織成一支震耳欲聾交響曲，搞到居民長期飽受滋擾，煩不勝煩，投訴不斷，當局今年初終於做嘢，對行人專用區實施俗稱殺街令嘅新管制措施，將開放時間由原先每周七日縮減至逢周六、周日及公眾假期，希望將「繞樑七日」嘅另類噪音減至最低，行人專用區從此唔使「夜夜生歌」，擾人清夢。
本來呢，噪音投訴響徹雲霄，當局唔可以當聽唔到，依家終於肯郁手做嘢，梗係好過翹埋雙手乜都唔做啦。問題係港產官僚做啲唔做啲，舊問題未解決，新問題又出現，街頭樂隊周一至周五被禁止喺行人專用區表演吖嘛，於是轉移陣地喺旺角道行人天橋演出，晚晚引吭高歌，次次大小喇叭，搞到毗鄰一帶大廈住戶晚晚發噩夢。有住戶無奈慨嘆，高峰期有四隊樂隊喺行人天橋表演，閒日每晚七點半就開咪，十點半至結束，唔止飽受困擾不勝其煩，女兒更加因為無法專心溫書而成績明顯退步添，你話港產官僚係咪累街坊吖。
更離譜嘅係，政府部門居然對新一輪噪音問題視若無睹，闊佬懶理。自從實施殺街令之後，當局喺短短兩個月間已經收到六十宗有關旺角道行人天橋嘅阻街及噪音投訴，問題不可謂不嚴重，但警方一味敷衍了事，只發出勸喻及警告，從冇提出檢控；食環署仲賴皮，話噪音問題唔關佢哋事喎，分明推卸責任。
港產官僚係咪畀噪音搞到思覺失調呀？殺街令殺絕唔到噪音已經失威嘅啦，依家收到投訴後居然充耳不聞，關人個關，咁就唔止係失威，更加係失職！嗱，當局唔好以為小事吖，本報記者日前實地視察，發現受影響大廈所錄得嘅噪音高達八十分貝，相當於一列火車喺近距離高速駛過嘅聲浪，你都咪話唔誇張。醫學界係咁講嘅，長期受噪音滋擾，容易產生抑鬱症，嚴重嘅話更加會演化成暴力行為添，當局唔通仲嫌社會唔夠戾氣咩！
講來講去，都係港府文化政策失敗累事。香港成日畀人話係文化沙漠，家陣難得民間興起一股藝術表演之風，當局點解唔提供舞台，讓人一展所長？好似西九文化區咁，一拖再拖蹉跎歲月，撥出一角畀人一展歌喉，總好過丟空養曱甴吖。外國民間能夠發掘出一個才華橫溢嘅靚聲「村姑」，香港藏龍臥虎，話唔定都有一鳴驚人嘅「街哥」。
當然啦，各位街頭歌者成名前必須惜聲如金，不分時間場合引吭高歌，唔係人人受落，如果真係想發洩而又苦無舞台嘅，咪去添馬艦「門常開」囉，可能會贏得更多掌聲添。