全體立法會議員獲中央邀請，下月十二及十三日訪問上海兩日，不過泛民主派扭扭擰擰，話去上海唔可以淨係參觀，要同中央負責政改嘅官員傾政改問題。點知特首梁振英尋日宣布中央決定從善如流，派出港澳辦主任王光亞及《基本法》委員會主任李飛去上海同立法會議員會面，而泛民就再一次扭計，話要同中央官員單獨坐低傾，如果唔係就會杯葛訪滬之行。如果中央真係接納泛民意見，肯單獨會見泛民議員，唔知佢哋到時又有咩藉口話唔去呢？
