政情：再訪心光 郭炳聯「樂」此不疲
新鴻基地產聯席主席兼董事總經理郭炳聯（Raymond）繼早前去正生書院探訪後，尋日又去到薄扶林心光盲人院暨學校探一班視障學生，仲欣賞佢哋彈琴、唱歌及打鼓。原來Raymond去年聖誕節已去過該校，仲畀一位失明及智障男生嘅音樂熱誠所感動，所以就決定資助該校聘請鋼琴同樂理教師，幫一班有天分嘅視障生實現音樂夢。
欣賞視障生才華
Raymond尋日再次踏足心光，班學生就表演中國鼓同唱歌，其中一位失明及輕度智障嘅中三男生劉亦強就用鋼琴彈奏日本動畫《龍貓》嘅主題曲，又自彈自唱意大利民歌《我的太陽》。劉亦強雖然睇唔到嘢，但係就有「過耳不忘」嘅天賦，一首樂曲只要聽過一次就會記得，真係認真犀利。
Raymond盛讚劉亦強係天才，當佢知道亦強想做音樂家後，就決心要幫呢班學生。Raymond又話，其實好多年前聽到心光學生唱歌已經覺得「好好聽，好有feel」，希望佢哋可以發展音樂才能，喺將來離開學校之後，都可以有好好嘅職業咁話。