政府一直靠轄下諮詢組織吸納社會上有地位人士，近排唔少企業生力軍陸續被政府網羅。政府尋日公布委任新一屆「太平洋經濟合作香港委員會」成員，就有多名企業二代身影，好似新委任嘅恒基副主席李家誠，續任嘅就有德國寶董事長陳國民嘅千金陳嘉賢。唔知李家誠會唔會好似佢兄長李家傑咁，遲啲對時事及民調發表見解呢？
睇番張委任名單，除咗呢兩位企業二代之外，仲有幾位新面孔，當中欽博凱都算係傳奇人物。
佢係英國人，不過就對中文有非常大嘅興趣，喺劍橋大學中文系畢業後，加入咗太古集團，先後喺台灣、香港工作，之後移居西安，○八年北京奧運會仲喺西安做過火炬手，依家就喺太古嘅合資企業大閩國際控股擔任營運總裁。
而貿發局研究總監關家明就接替退咗休嘅梁海國。其他連任者仲包括新婚幾個月嘅中大社會科學院副教授沈旭暉等人。所有成員嘅任期將由下月一日開始，為期兩年。