政情：奸商剋星硬撼官府
市民對政府部門或公營機構表現不滿，可以向申訴專員公署投訴。而申訴專員公署咁多年嚟，都踢爆唔少政府部門做嘢甩甩漏漏，成功為小市民出番啖氣。現任申訴專員黎年三月尾正式卸任，政府尋日宣布由前消費者委員會總幹事劉燕卿（Connie）接任。Connie嘅「女包青天」形象深入民心，過往對付無良商人確有一手，但係冇公務員經驗嘅佢面對龐大嘅政府官僚系統，窿窿罅罅咁多，唔知佢能唔能夠勝任呢？
Connie大學畢業後，七四年就加入消委會，一做就係三十幾年，到○七年更升至消委會總幹事，絕對有資格稱得上係消委會「老臣子」，而消委會成績大家有目共睹，經常踢爆無良商家點樣鑽盡空子扼殺消費者權益，令小市民更有保障，亦有助紓緩平民百姓怨氣。
非政務官出身
不過，Connie過往三十多年嘅對手係商家，但係未來要應付嘅係十幾萬公務員，的確係兩個世界。眾所周知，申訴專員接收市民投訴個案後，有權調查政府部門同公營機構有冇行政失當，不過如果唔熟悉公務員運作同政府架構，分分鐘被公務員玩番轉頭，調查完都係得個吉。所以過往申訴專員一職向來由資深政務官出任，貪佢哋了解成個官僚系統。但Connie唔係政務官出身，畢業後只做過消委會一份工，雖則期間兼任過唔少公職，例如食物安全專家委員會、旅行代理商諮詢委員會等，但始終缺乏同政府各部門交手經驗，究竟佢腰骨夠唔夠硬淨，會否被公務員玩殘，睇嚟有待觀察。
已經年屆62歲
今次任命另一特點，係公布時間非常趕急。過往政府宣布公職人選任命，通常會早幾個月，但今次Connie喺公布任命後不足半個月就要履新，畀人「臨危受命」嘅感覺。到底政府係咪一直搵唔到心水人選做申訴專員呢個「三煞位」，又唔想叫黎年延任，先急急腳搵佢「頂檔」呢？再講Connie今年已年屆六十二歲，同即將退任嘅黎年相比，劉燕卿只係後生一年咁大把，如果黎年夠鐘退休，劉燕卿又憑咩做足五年任期呢？實在令人費解。