中環出更：外展攻勢 谷青少做選民
選舉事務處近日開始新一輪選民登記活動，立法會政制事務委員會尋日開會討論有關問題，選舉事務處總選舉事務主任李柏康大呻唔少年輕人對政治冷感，即使當局喺網絡大賣廣告，依然吸引唔到青少年登記做選民，搞到當局要化身社工提供外展服務，連大學開放日都唔放過，總之就係奇招盡出，催谷青少年登記做選民。
李柏康話，十八至廿五歲嘅選民登記率，已由○九年嘅百分之四十六上升至去年接近六成，但登記率仍然低於整體登記率。選舉事務處今年預留五百七十七萬元，透過電台、電視台及網上平台大賣廣告，甚至去大學同中學張貼宣傳海報，呼籲青少年登記做選民。
派員去中學游說
有議員質疑當局使咗咁多錢，但都係吸引唔到後生仔女登記做選民，質問當局仲有無其他方法。人民力量陳志全就話，選舉事務處會唔會送紀念品「利誘」未登記嘅市民？李柏康回應指，當局除咗會派職員親自去中學游說學生登記做選民，仲會喺全民運動會、青年馬拉松等活動上宣傳，誓要推高青年登記率咁話。
卓妮