「但看古來歌舞地，唯有黃昏鳥雀悲。」今時今日嘅香港，似唔似呢兩句唐詩所描述嘅情形？功夫茶唔係詩興大發，而係有感而發咋，香港愈來愈烏煙瘴氣，真係幾可悲。
係人都知，回歸前香港係繁華之地，歌舞昇平，安居樂業，係名副其實嘅福地；可惜回歸後不斷沉淪，經濟低迷，民生凋敝，福地變成亂地，點可能唔悲吖。同一個香港，點解回歸前後會有咁大分別呢？原因好多，除咗港府無能、施政混亂之外，社會愈來愈政治化亦係其中一個主要原因。
遠嘅唔提，就講今年吖，政改爭拗愈演愈烈，搞到劍拔弩張，烽煙四起，令沉默嘅大多數不勝其煩。呢，反對派提出所謂三軌方案，而且堅持缺一不可；而北大人就提出「一個立場、三個符合」，擺明唔會讓步，雙方各持己見，雞同鴨講。其實，正如有人話齋，中央不可能改變《基本法》關於特首選舉嘅框架，繼續爭論是否落實「公民提名」，根本就係浪費時間。
冇錯嘞，香港回歸後其實一直喺度蹉跎歲月，浪費時間。隨着社會愈來愈政治化，部分人熱衷於搞街頭鬥爭，成日內鬥內耗，令動感之都淪為動亂之都，反而經濟民生冇人關心，深層次矛盾冇人解決，導致競爭力不斷下跌，畀老對手新加坡愈拋愈遠，幾乎食塵咁滯。現屆政府話就話要「穩中求變、適度有為」，弊在阻力重重，動輒得咎，束手無策，徒呼奈何。
咁都唔止吖，反對派揚言如果政改傾唔埋欄，就會佔領中環，癱瘓金融中心喎，到時亂上加亂，香港想唔死都幾難。最好笑嘅係，中央為求息事寧人，向反對派伸出橄欖枝，邀請全體立法會議員訪問上海，點知部分反對派議員唔領情，北大人食咗個檸檬。其實，就算所有議員接受邀請齊齊訪問上海，咁又點吖，咪又係你有你講，佢有佢講，想就政改達成共識？好難咯！
有人講得啱，部分人根本唔想香港落實普選，希望上海之行可以令政改過關，實在太天真。話時話，有啲政客一向以爭取民主為口號，一旦香港落實普選，佢哋連政治本錢都冇埋，豈不是要失業？好明顯，呢啲政客只係想攪亂香港，以便渾水摸魚，爭取民主係假，爭取選票至係真，大家千祈要睇清楚佢哋嘅真面目吖。
總而言之，沉迷於搞政治必定冇運行。香港回歸咁耐，亂足咁耐，幾時至可以撥亂反正呢？京官提醒香港人要把握機遇，唔好成日嘈嘈吵吵，無疑用心良苦，可惜冇幾多人可以聽入耳。睇嚟香港可能真係氣數已盡啩！