政情：「四高」戴凱欣 唔會女追男
早前有調查指擁有高學歷、高職位、高收入同高年齡嘅「四高」香港單身女性，好多都感覺生活得唔開心。自認屬於「四高」嘅四洲集團太子女戴凱欣（Kennis）接受電台訪問時，自爆曾有男性友人直言唔敢追求佢，令佢有一段時間好唔開心，但依家佢覺得自己家境咁好，又有咁多屋企人同朋友錫佢，已經好滿足同好幸福嘞，唔會再諗埋一邊喎。
問佢會唔會主動出擊追求心儀嘅男士，Kennis坦言諗過，但最後真係接受唔到，依家交友只會順其自然。
視爸爸為偶像
Kennis又透露，爸爸四洲集團創辦人戴德豐以前管得佢好嚴，到讀大學時仍然唔畀佢自己出街玩，直到後來留學澳洲先至有番啲自由。不過，佢並無因而怪責爸爸，反而視對方為偶像，盛讚爸爸無論幾忙都好顧家。依家佢喺家族公司幫手，爸爸亦經常問佢有咩新諗頭，好重視佢嘅意見，令佢愈做愈開心。