政情：愛港力請願 促白鴿「智」歉
白鴿黨早前投訴警方濫權，喺中西區區議會一個小組會開會時，強行抬走該黨區議員許智峰。愛護香港力量（愛港力）十多名成員尋日去咗灣仔警察總部外請願，批評許智峰破壞會議秩序在先，期間仲涉嫌整傷咗啲保安員，警方將佢抬走係依法辦事，因此特意向警方遞交感謝信，並要求許智峰向警方道歉。
預告踩場旁聽內部會議
愛港力召集人李家家話，許智峰當日帶埋大班閒雜人等進入會場搞事，賴死唔走，如果咁都話冇問題，佢哋唔排除將來會「以其人之道，還治其人之身」，踩場要求旁聽白鴿黨嘅大小內部會議，睇吓該黨到時又會唔會報警要求抬佢哋走。
當日有份出席會議嘅中西區校長聯會司庫李月英亦向本報表示，許智峰嘅黨友、區議會增選委員吳兆康喺事發時，用手機貼晒面咁拍攝與會人士，其後更涉嫌用腳踢人，因此先有人報警及要求保安員協助，最後許智峰三度與保安員發生肢體碰撞，有人被推倒地上，警方先至迫不得已出手，絕對無政治執法，白鴿黨高層應該好好睇清楚段影片，唔好盲目護短。