政情：「祥」遠大計 辦辛苦學校

跌親擦傷 家長投訴無叫白車

張灼祥喺傳統名校男拔做咗十二年校長，見盡學生百態，就算依家已經退休，好多人都改唔到口叫佢「張校長」，佢尋日出席教育講座分享升中心得，就吸引唔少家長慕名而來。佢話，當年面試見過好多學生答問題時表現生硬，呢類學生通常好快被「叮走」，佢就最欣賞有自信同表達清晰嘅學生，另外中英語言能力佳，同埋識得特別樂器，好似大提琴、琵琶等，都可以加分。

提到學生愈來愈嬌生慣養，張校長忍唔住分享自己多年來遇過嘅「奇聞」。佢話以前寄宿學校夏天多蚊，有學生試過被蚊針咗幾啖，家長就好緊張叫學校將每張床裝蚊網，仲有學生喺校內跌親，膝頭擦傷少少，家長竟然投訴學校冇叫救護車喎。「依家啲小朋友萬千寵愛在一身，遇到困難咩都有父母幫手搞掂，學習上又有晒安排，慢慢失去尋求知識嘅動機。」

搞緊基金 資助清貧學生讀書

有見及此，佢就構思緊開間「辛苦學校」，仲想邀請一班退休教師合作，佢笑言「辛苦」唔係軍訓式要求體力上嘅辛苦，係要求學生學習自主，要自己搵學習素材，學到新嘢仲要寫報告分享，希望改變「死背式」教育。不過，佢話「辛苦學校」就算學生有興趣入讀，家長都未必肯畀子女辛苦，又要過教育局嗰一關，所以依家都係得個諗字，希望有生之年搞得成喎！

張校長依家幫緊私人公司搞教育基金，希望可以資助清貧學生讀書，雖然仲係籌備階段，但佢已經着手準備籌款工作，睇嚟佢對教育仲好有熱誠喎。