政情：中環出更：吳得掂扮先知 「保老師」叫降呢
根據教育局預測，未來幾年中一學生人口將會由六萬四千人下跌一萬多人，但之後數字會回升，突破現時嘅水平，所以當局就喺去年推出「三保」政策，即「保學校、保老師、保實力」。當中有關「保老師」一環，當局除咗建議過剩嘅老師可以減工作量或多啲進修外，教育局局長吳克儉（吳得掂）尋日出席活動後，仲暗示叫啲老師冇得撈就降呢教小學或幼稚園。
吳得掂話，現時會以「保老師」為本，將剩餘老師人手用作減少工作量，以前平時冇時間進修嘅，可趁機會去進修下，或加強科目支援，冀能「轉危為機」。不過，被問到至於是否有信心確保老師就業，吳得掂就表現到好似「先知」咁款，話一早就預計到呢個情況，聲言未來小學及幼稚園會有不少老師退休，作為專業嘅老師，當局一定有機會安排佢哋喺不同場合對香港作出貢獻。
嘩，吳得掂咁講法，係咪即係暗示叫啲老師如果無得撈，就轉去教小學或幼稚園呢？佢就講得輕鬆，教小學都話勉強可以，但要一個中學老師轉去教幼稚園，除咗重新要學過外，仲要睇下係咪適應，乜佢咁多年來真係做人力資源工作咩？
卓妮