政情：中環出更：有心行善須付出時間
慈善機構籌款活動停不了！仁濟醫院慈善餐舞會早前喺灣仔君悅酒店舉行，當晚到場政商名人眾多，包括首次出席仁濟活動嘅醫院管理局主席梁智仁、工業總會主席劉展灝夫婦及圓玄學院主席陳國超等，現場仲有幾位靚仔稀客，包括仁濟醫院副主席林煒珊（Vanessa）細佬林孝信、本地高級女裝品牌慕詩（Moiselle）太子爺兼創作總監陳柏熹（Harris），為晚宴增添不少活力。
Vanessa獲丈夫及細佬現身支持，佢話仁濟係一個成熟嘅慈善機構，來屆佢將升呢做負責籌款嘅第一副主席，雖然經濟環境唔係咁好，但係籌款唔係大問題。佢又感慨話，香港有好多善心人士，要佢哋捐錢唔係問題，但最緊要係付出時間。講講吓，Vanessa轉頭就叮嚀細佬唔好咁貪玩，要多啲跟住佢參與仁濟工作喎！
仁濟新大樓秋季落成
另一位稀客Harris就為當晚時裝騷環節監場兼打氣，佢同仁濟醫院副主席嚴徐玉珊囡囡嚴紀雯（Carmen）老友鬼鬼，Carmen仲話Harris係佢最好嘅男性朋友添，佢出席派對着嘅晚裝長裙都係Harris嘅出品。當晚一眾身材高挑嘅靚女模特展示最新春夏時裝，仁濟醫院候任主席蘇陳偉香（Susan）及嚴徐玉珊睇完騷後即刻捉住Harris密密傾，唔知係咪想預訂一套新裝喺下月就職典禮時穿着呢？
未夠一個月就要接任主席嘅Susan話，仁濟醫院新大樓將於今年第三季落成，加上轄下唔少服務需要大量資金，希望各界善長齊齊種福獻愛心。
卓妮