龜兔賽跑嘅故事，相信大家早就耳熟能詳，原意係叫人唔好驕傲自滿。點知財政司司長曾俊華自作聰明，作出另類演繹，佢以烏龜代表收入，白兔代表開支，聲稱就算白兔過去一直貪睡，畀烏龜先行，但只要白兔唔再瞓覺，無論烏龜領先幾多，遲早都會畀白兔超越，寓意港府開支遲早會超過收入喎。你話係咪九唔搭八吖？
咪話功夫茶踢爆，鬍鬚曾不斷高叫「狼來了」，除咗為守財奴式理財作風及預算案大幅減甜狡辯之外，另一個目的無非為政府加價製造藉口。佢喺預算案中聲稱不排除任何增加收入嘅方法，包括檢討涉及民生嘅政府部門收費，例如水費、文康設施及環境衞生服務等等。果然，鬍鬚曾話口未完，康文署就放出風聲，表示正檢討博物館及康體場地嘅收費，料今年內提交報告喎。
不妨聽吓康文署署長馮程淑儀點樣解畫，佢指文康設施一直由政府補貼，比例高達八成多，調整收費唔止為咗增加政府收入，亦考慮政府體育政策目標、市民需求及負擔能力等，就算日後加費，亦唔可能百分百收回成本咁話。
嗱，呢啲咪叫「欲加之價，何患無詞」囉。政府為市民提供服務，天經地義，如果次次都話用者自付，樣樣都要收回成本，咁市民仲使乜交稅吖？不可不知，除咗文康設施計劃加價之外，當局亦揚言會增加水費，連考評局亦事先張揚準備調高考試費，加加加加加，當局究竟有冇考慮過市民嘅感受呢？又有冇考慮過基層嘅負擔呢？最離譜嘅就係考評局，一邊派花紅自肥，一邊向考生開刀，簡直豈有此理。
正如有人話齋，港府喺新財政年度削減紓困力度，加上通脹等因素，市民生活本已艱難，若政府再上調水費等涉及民生嘅收費，基層生活何止百上加斤，直頭雪上加霜添吖。而最令人擔心嘅係，政府帶頭掀起加風，隨時引起連鎖反應，一旦私人機構爭相跟隨，你加佢加齊齊加，通脹率唔直線飆升至奇，到時激起民怨咯喎，睇當局又點樣補鑊。
今時今日，經濟低迷，民生凋敝，港府冇體恤民困不特止，反而密謀加價，進一步增加市民負擔，可謂倒行逆施。係人都知，庫房長期水浸，港府窮到只剩下錢，根本唔需要加價，鬍鬚曾一味呻窮，純粹靠嚇嘅咋。咪話功夫茶唔提醒吖，今年係政改年，一方面社會愈來愈政治化，已瀕臨爆煲邊緣，另一方面港府民望插水，動輒得咎，喺咁嘅情況下，如果當局一意孤行調高民生收費，隨時火上加油，唔衰攞嚟衰呀！