今年初政府已喺政務司司長官邸搞過四場政改晚宴，同立法會議員坐低交流政改意見。食髓知味，政府再計劃下星期搞早餐會，並安排議員同中聯辦法律部官員「輕鬆、無壓力、非正式」咁會面討論政改。
不過，據悉今次早餐會不但移師政府總部舉行，眾人仲要困喺會議室內進食，議員官員發表意見前要先對準個咪至可以講嘢，似乎一啲都唔輕鬆喎。
為咗遷就朝早要趕返立法會開工嘅議員，呢四場早餐會特別改喺鄰近立法會嘅政府總部開餐，據聞每場約有二十名議員、官員出席。
由於政府總部冇自設飯堂，眾人將會困喺會議室內食早餐。試諗吓，廿幾人坐喺會議室，每人講嘢都要開着座位支咪，參加者先至聽得清楚，點做到政制及內地事務局局長譚志源早前提出希望大家可以「暢所欲言」嘅目的呢？
至於早餐餐單，亦會由政務司司長官邸嘅廚房煮定，然後再送去政府總部，相信送到去時乜都攤凍晒啦！今次早餐會唔只食物「變質」、會面形式都「變質」，莫講話達成共識，最終係咪可以成功縮窄分歧都好難講囉。