政情：馮英倫出任發展局政助
發展局前政治助理何建宗去年因為涉嫌漏報家族資產而辭職後，佢個政助位一直懸空，直到尋日政府終於公布接任人，就係曾擔任候任特首辦項目主任嘅馮英倫，下周一上任。政府公布有關任命後，馮英倫隨即接受某網媒訪問，強調自己冇物業、冇地及冇感情缺失。
稱冇物業 擁多項公職
其實有冇物業根本唔係重點，最緊要跟足規矩申報利益，唔通真係好似上水鄉事委員會主席侯志強話齋，政府要搵啲冇物業嘅「廢人」做嘢咩？
現年三十歲嘅馮英倫，喺香港大學畢業後即刻幫特首梁振英做咗七年公務助理，專責做文膽。到CY參選特首時，馮英倫索性做埋競選辦一員，之後仲當上候任特首辦項目主任。到特首選戰後，佢又投身商界，先後幫多位人大、政協嘅私人企業打工，無論商界、政界都有唔少人脈經驗，相信佢做政治助理冇乜問題。唯獨係佢一人身兼多項公職，包括中華全國青年聯合會委員、菁英會副秘書長、香港青年聯會會董等。