政情：立會樓王樓后隔山買磚
自從政府實施多項印花稅後，雖然有助打擊炒樓及令樓價開始有回落迹象，好多投資者仲轉戰境外買樓。我哋近日睇過立法會議員個人利益登記冊，發現兩名被喻為「樓王」、「樓后」嘅建制派議員陳鑑林（橄欖）同梁美芬，不約而同轉戰內地、甚至海外投資物業，佢哋點睇香港樓市前景，相信都可見一斑喇。
梁美芬投資加州
其實睇番資料，梁美芬自○八年當選立法會議員後，由一開始喺西半山、九龍西、汀九及屯門擁有共六個物業，之後頻頻買入賣出物業，但就賣多過買。一○年十一月政府率先落實額外印花稅（SSD），佢就只係喺九龍西買過樓，到依家就只剩下三個物業，而且樓價亦有回落迹象，睇嚟佢對投資物業都真係有一手喎。
不過，梁美芬今年二月十四日情人節當日，買咗一個美國物業，佢透露個單位喺加州，面積唔係太大，話係投資顧問建議佢用來放租嘅。咁佢係咪唔睇好本港樓市？佢就承認香港樓價好高，相反美國樓價相宜，甚至平過中國二三線城市喎。但買樓都幾棹忌「隔山買牛」，梁美芬就話今勻唔驚，皆因佢啲投資顧問有法律背景，尤其海外投資更要有可靠嘅專業顧問，唔怕次按危機重臨咁話。佢又強調只係純粹投資，事關佢一向都鐘意保守同長遠嘅投資，買磚頭就最啱佢喇！
至於做過房委會委員嘅橄欖，投資物業都係佢興趣之一，佢多年來只係向立法會申報喺港、九、新界及內地持有物業，○五年曾有報道就話佢擁有七個物業。睇番申報，橄欖就喺去年十二月二十八日起，成為一間公司Kingrich Trading Co. Ltd. Liberia嘅董事。
陳鑑林北望神州
我哋問過橄欖，佢承認開設公司目的係為咗投資物業，至今佢喺內地買咗一至兩間物業，主要用來收租，又承認香港樓價好高，稅又收得重，唔係理想嘅買樓時機喎。佢哋嘅意見係咪有參考價值，大家就自行判斷喇！