政情：中環出更：保良局拉隊試食監獄飯
懲教署署長單日堅近日頻頻安排慈善團體參觀懲教所或監獄，繼早前安排樂善堂成員到歌連臣角懲教所歎下午茶後，日前又安排一眾保良局成員參觀赤柱監獄，一嘗監倉飯滋味。出席嘅除咗將於月尾卸任保良局主席嘅鄭錦鐘（Eric）同太太外，仲有第一次踏足監獄嘅總理蔡李惠莉。蔡太話，估唔到監獄入面啲飯餸同奶茶嘅味道都唔錯，仲大讚好健康添。
如無意外於今年底退休嘅單日堅，一九七九年已經加入當時嘅監獄署擔任督導員，○五年開始出任助理署長，所以佢對赤柱監獄非常熟悉。原來佢當年喺銀行打工，因為朋友搵佢一齊報名投考監獄署，之後一做就做到依家。當日佢帶大家參觀獄中嘅標誌性大鐘樓外，仲去埋甲級犯人綜合大樓、醫院、圖書館及飯堂，並見識囚犯造鞋、印刷、製造街道路牌及垃圾桶等工作。
味道唔錯 有奶茶飲
不過，講到印象最深刻，當然係齊齊試食監倉飯啦，原來獄中除咗早午晚三餐外，仲有睡前小食。以晚餐為例，就有四款提供畀唔同飲食文化嘅囚犯用餐，包括咖喱薄餅、麵包、中餐及素菜，每款份量均有限制，不能隨意加減，除非有特別理由，否則一般都會供應中餐畀本地人，食物包括雞中翼、蔬菜、白飯及清茶。
蔡太話，今次係第一次食監倉飯，估唔到味道唔錯，仲驚訝有奶茶飲添，味道同茶餐廳奶茶差唔多。Eric參觀完之後就留低字句，表示了解多咗懲教工作，並會支持更生服務。
卓妮