係人都知，官僚主義係地區施政嘅最大阻力，所以咯喎，今年施政報告提出先導計劃，放權地區強化管理，唔少人都寄予厚望。依家先導計劃究竟搞成點呢？成績又如何呢？
嗱，先導計劃涵蓋深水埗及元朗，講明重點工作係搞好街頭衞生，但本報記者去深水埗視察過，發現區內白鴿為患，唔止鳥糞隨處可見，穢不可聞，仲隨時傳播禽流感添，何止令人失望咁簡單。難怪有地區人士批評，區內鴿患長期無人跟進，反映「官患」問題根本從未改善過。
再睇吓元朗，計劃指明優先處理非法停泊單車及郊區蚊蟲雜草問題，點知時至今日，呢兩個問題不但無改善，反而不斷惡化，西鐵站同公共屋邨外面紛紛淪為單車違泊停車場，而區內嘅大樹樹底亦紛紛變身烏煙瘴氣垃圾堆。你話嘞，先導計劃係咪無料到吖！
話時話，先導計劃成效不彰，一啲都唔令人意外，係人都知港府施政從來都係虎頭蛇尾嘅喇。正如有區議員話齋，港府以為透過加強民政事務專員角色，以及賦予地區管理委員會決策權力，就可以擺平衙門山頭，理順行政，實在係太傻太天真嘞，近年嘅民政專員年紀輕、官階低，邊有能耐點得郁班官場老油條吖，嘥氣。
講到呢度，大家應該明白點解地區行政搞來搞去都搞唔好喇。一來，山頭主義盛行，卸責文化嚴重，話急市民所急，想市民所想，根本係吹水唔抹嘴。二來咯喎，添馬艦「門常開」推行新政思慮不周，眼高手低，話就話「地區問題，地區解決」，其實係「地區問題，永冇解決」就真。咁講喇，今屆政府肯放權地區係好事，不過搞到連責任都一併下放埋，又冇統籌，又冇監督，又冇跟進，即係得個樣嘅啫，咁嘅政策隨時仲廢過元朗樹底下啲廢物囉。
講開又講，港府搞地區改革事與願違，都唔係第一次咯。就講地區小型工程吖，當局由○八年起容許十八區區議會自行審批，目的係改善地區設施，點知好心辦蠢事，浪費咗十幾億元不特止，仲留低一大堆不倫不類嘅「政績工程」獻世。嗱，港府舊年年初為十八區各預留一億元籌建所謂嘅「社區亮點項目」，隨時又係淪為「社區污點項目」嘅咋！
一句講晒，港產官僚無料到，權力下放枉做騷。自從回歸後港府「殺」咗市政局同區域市政局，前兩任特首董建華同「貪曾」曾蔭權爵士都承諾改革地區行政，結果全部都係大隻講，今屆政府強調「穩中求變，適度有為」，講就好聽喇，但究竟做唔做得到，仲要睇過至知，但如果連先導計劃咁小嘅事都搞到荒腔走板，咁就真係冇眼睇咯！