政情：高佬賢「案件重演」寸爆AV仁
自從民主黨立法會議員何俊仁喺財政預算案公布期間睇水着艷照後，因而被冠以「AV仁」稱號，認真教壞細路，枉為立法會議員。繼「正義聯盟」召集人李偲嫣送珍藏版o靚模寫真集送畀AV仁番屋企欣賞外，建制派議員鍾樹根同何俊賢尋日就趁立法會開會發言，聯手寸爆AV仁。
話說立法會資訊科技及廣播事務委員會尋日開會，討論香港電台延續副廣播處長編外職位及增建輔助發射站。樹根就質疑，點解現任副廣播處長會出席會議，係咪想畀壓力議員要延續佢個職位，講講吓佢就覆述黨友何俊賢發言，點知講歪咗音，講咗何俊「仁」，事後佢笑笑口澄清講緊嘅係「好專心嗰個」，跟住何俊賢就好識配合，即時拿起自己部平板電腦作狀係咁掃，齊齊寸爆AV仁開會睇艷照。睇嚟AV仁呢單醜聞有排畀人笑喇！
