每逢北京兩會期間，港區人大同政協按慣例分別入住北京飯店同貴賓樓，每逢醫肚時都唔想行太遠，所以好多人都試過幫襯酒店附近一間出晒名嘅「謀人寺」飯店。聽講呢間飯店向來以天價收費，蒸條普通石班仔都要千多元，加埋紅酒、茅台。平均每人消費閒閒哋都四、五千元人民幣落樓。
所以，光顧嘅食客除非身家夠疊水又豪氣，否則多數食完都覺得被斬到一頸血兼一肚氣。
不過，隨着內地吹起廉潔之風，呢間專劏人大政協嘅飯店今年突然轉走平民路線，雖然依然一樣有貴價鮑參翅肚賣，但好多小菜都係七、八十元人仔有交易。唔只價錢變平，以往門口廣告從不標價，今年就大大隻字寫住可以優惠價食到隻北京填鴨。
由於呢間飯店口碑麻麻，就算佢哋改行平民路線，都已經冇乜人大政協幫襯，反而一班住喺北京飯店嘅本港電視台記者同攝影師，就夠膽去「試食」。聽聞食後報告唔錯，每人百多元人仔就落到樓。