政情：宣傳《基本法》區會玩維穩

白鴿議員 當選工作組主席

自從白鴿黨葵青區議員林立志當選工作小組主席後，建制派議員即時知驚，仲急急腳加入小組，費事泛民主派借工作小組宣傳公民提名。不過，據講建制派議員之所以識得要加入工作小組，全因被有關方面「照肺」，鬧佢哋太大意，連啲咁重要嘅職位都要讓畀泛民議員。換句話講，基本法嘅宣傳工作撥款緊要過一億元重點工程項目，班建制派嘅政治危機意識冇理由咁低。

點知上星期中西區區議會開會討論《基本法》推廣活動撥款時，會議小組主席李志恒以未徵得出席議員同意為由要求進行閉門會議，又拒絕畀公眾人士同記者旁聽。最後有委員作出三次警告後決定報警處理，幾名警員到場後將白鴿黨許智峰抬走，被質疑違反區議會議事規則。

中踩場計 被指違議事規則

有地區人士話，白鴿黨呢啲踩場伎倆已經舊到唔舊，但班建制派依然中計，認為必要時將會議流會就搞掂，無必要同泛民正面衝突喎。

據聞有關方面亦下令其他區議會嘅建制派議員喺討論宣傳工作撥款時一定要坐定定，兼且要刨熟議事規則，以免到時又出現甩轆，甚至被泛民突襲成功當選工作小組主席。葵青區議會原本決定今日召開推廣認識基本法工作小組，但就因為中西區區議會抬走議員一事而決定押後審批撥款會議，改為先研究會議應否以閉門形式進行。至於中西區公民教育工作小組今日會再次開會審批撥款，仲表明會議會公開進行，費事有泛民又用呢個藉口批評佢哋黑箱作業喎。