中環出更：陳恒鑌遊台 不忘做民調
因為唔少建制派立法會議員要到北京出席兩會，令立法會要休息兩星期。議員陳恒鑌（Ben）就趁住呢個機會同老婆帶埋讀幼稚園嘅囡囡去台灣清境玩咗四日，仲入住當地非常出名嘅民宿添。阿Ben為咗可以同囡囡一齊去旅行，「怪獸家長」上身幫囡囡請假，但囡囡竟然義正詞嚴咁同老竇講話覺得請假唔多好，搞到阿Ben面懵懵。
近年訪港旅客屢創新高，引發唔少中港矛盾，有團體更加喺鬧市發起集會，表明唔歡迎內地旅客到訪。雖然阿Ben走到清境，但仍然同當地居民收集意見，問佢哋介唔介意咁多大陸旅客到訪。點知當地居民話一啲都唔介意，因為大陸旅客會幫襯當地食肆同店舖，變相刺激當地經濟。阿Ben慨嘆香港淨係得金舖同化妝品店，太少地道小店，令城市面貌愈來愈單一兼乏味。
阿Ben又話，已經同黨友何俊賢去信立法會食物安全及環境衞生事務委員會，要求委員會考慮去台灣考察當地漁農業同旅遊政策，希望本港考慮修改法例，等漁農業從業員兼職從事旅遊工作喎。
卓妮