古語有云，學如逆水行舟，不進則退。呢句話一樣適用於辦學，如果不思進取，自甘墮落咯喎，即使係歷史悠久嘅知名學府，一樣會節節敗退，畀人拋離嘅咋。嗱，香港嘅大學就係一個活生生例子嘞。
英國《泰晤士高等教育》公布最新全球大學名氣榜，香港有三間大學打入一百強，成績似乎唔錯，可惜排名差強人意，尤其香港大學排名急跌七級至四十三位，簡直慘不忍睹。雖然科大及中大都躋身一百強，其中科大排名仲急升十級至五十一至六十位添，可惜始終補唔番港大排名急跌帶畀香港人嘅遺憾。反觀主要競爭對手新加坡就啱啱相反，新加坡國立大學排名連年上升，今年再升一級排二十一位。而日本東京大學及京都大學更加分別排名第十一位及第十九位，連同新加坡國立大學，成為亞洲最具名氣嘅三間大學。
話時話，香港嘅大學排名急滑已經唔係新聞。舊年《泰晤士高等教育》公布另一份不同評分標準嘅世界大學排名榜，港大連續四年排名下跌，只能排於四十三位。當時主辦單位警告，港大喺教學及學術研究等水平都持續下降，排名有機會跌出亞洲區前列位置，結果真係一語成讖。香港近年乜都輸畀人，整體競爭力下跌，營商環境評分下跌，廉潔指數下跌，貨櫃港排名下跌，家陣連大學排名都畀新加坡愈拋愈遠，咁搞法，想唔沉淪都唔得喇。
正所謂，各有前因莫羨人，香港由勤奮少年變咗懶蟲學生，大學排名急跌又有乜出奇呢？就講教育質素吖，前朝貪曾政府大搞「教育慘業」，部分院校嘅辦學宗旨唔係培育人才，而係培育錢財，搞到學府變學店，醜聞百出，亂象叢生。試問喺呢種禮崩樂壞嘅濁流下，教育質素有乜可能唔每況愈下吖？大學排名又有乜可能唔跌跌不休吖？講句唔好聽，大學因財施教，道德淪落，再咁落去，莫講大學排名節節後退，成個香港都會急速衰落吖！
當然喇，學府愈來愈唔似樣，除咗教育質素下降，更加重要嘅原因就係乜都政治化。大學校園本來係白色象牙塔，春風化雨，寧靜和諧，教師授道解惑，學生明德格物，可惜今時唔同往日，大學校園變咗文革批鬥場，白色象牙塔變咗政治鬥獸場，連大學學生報都鼓吹「港獨」，連大學民調都被指淪為政治工具，風風雨雨，吵鬧不休。你話嘞，大學校園烏煙瘴氣，人人熱衷於搞政治，而唔係搞教育，名聲點會好吖？排名點會高吖？
見微知著，大學係社會嘅縮影，香港嘅大學排名節節後退，正正就係香江沉淪嘅寫照。唉，成個社會陷於政治泥沼不能自拔，遲早自取滅亡嘅咋！