政情：金管局貿發局打鑼搵人接手
新一輪公職換人潮即將上演！○九年出任金融管理局總裁嘅陳德霖（攞命陳），任期將於今年九月屆滿，同樣要換人仲有貿發局主席一職，究竟邊個有能之士會跑出，大家擔定櫈仔等住睇好戲喇！
史美倫撐「攞命陳」冧莊
有傳梁營有意力推金融發展局主席史美倫（Laura）接任金管局，Laura一直對呢個傳聞三緘其口，不過佢尋日喺北京被追問時，就一輪嘴力撐攞命陳連任，形容佢工作表現良好喎！
究竟Laura呢招係真心，定係以退為進，只有佢本人至知喇！
值得一提嘅係，攞命陳一旦今年九月再獲續任，外界將關注佢嘅年薪會否繼續向上調升。資料顯示，攞命陳於一二年總酬金已達九百四十一萬元，預料續任後嘅年薪突破一千萬元只係時間問題。
至於貿發局主席一職，現任主席蘇澤光（Jack So）上月中出席春茗活動時事先張揚唔會再續任主席一職，Jack So打晒開口牌，都係想畀政府多啲時間搵接任人，究竟邊個會跑出，半年後自有分曉。