立法會議員劉慧卿（卿姐）擔任議員廿幾年，工作忙碌嘅佢依家係單身一族。佢接受電台訪問時就話，早出晚歸嘅生活同繁重嘅工作令到佢即使冇男伴都不感寂寞，被問到係咪因為性格太過剛烈而嚇窒追求者，卿姐就話自己其實好和善，只係經常畀傳媒捕捉到佢「肉緊」嘅一面，先令外界誤會佢係一個兇惡嘅人喎！
卿姐喺尋晚播出嘅電台節目訪問中就話自己依家獨居，但每朝六點幾就要起身，通常都工作到夜晚十二點先返屋企，忙起上嚟快手食個即食麵就當晚餐。
節目主持人就問卿姐，工作咁忙碌豈不是冇時間拍拖﹖卿姐就話，因為工作繁重，所以就算冇男伴都唔會感到寂寞。佢仲婉拒主持人話介紹男士畀佢嘅美意添。
卿姐喺議事廳上聲大夾惡，就算接受電視台訪問亦成日開足火力鬧人，剛烈嘅形象一早已經深入人心，但係卿姐就話自己其實好和善，而且非常鍾意小朋友，只係外界誤會咗佢咁話喎。