政情：政府交功課例遲
審議法例係立法會嘅重要工作，不過政府經常遲交條例草案，搞到班立法會議員「皇帝唔急太監急」。話說政府原定喺今個立法年度嘅上半年提交十一項條例草案畀立法會審議，點知到依家先交得五條，其餘嘅唔係放咗喺下半年議程，就係唔知點解「隱咗形」，其中以財經事務及庫務局同食物及衞生局遲交功課嘅情況最嚴重。立法會內務委員會副主席湯家驊就批評，政府次次都遲交功課，不過今年就最嚴重，仲揶揄係咪公務員工時太短做唔切咁話。
上半年度欠交逾半
政府原本計劃喺今個立法年度上、下半年分別提交十一條同十七條條例草案，不過上年度過埋，政府先向立法會提交咗五條，其餘五條就延遲至下半年提交。大家計落係咪仲差一條呢﹖冇錯喇，「隱咗形」嘅就係財經局嘅《證券及期貨及公司法例（投資者保障修訂）條例草案》。
財經局仲有一條《保險公司（修訂）條例草案》喺上半年走咗數，而佢哋原定下半年提交嘅《結算及交易系統（修訂）條例草案》亦都無啦啦剔出咗下半年嘅議程，可以話係走數之王。財經局回應話，有關保險業同交易結算嘅條例草案預計會喺今年第二季同下個立法年度提交，至於被隱形嗰條就要再深入研究下先喎。
欠交功課嚴重程度僅次於財經局嘅係食衞局，該局上半年未能提交嘅分別係《電子健康記錄互通系統草案》同《藥劑業及毒藥（修訂）條例草案》。食衞局回應話，前者係因為涉及醫療、資訊科技及私隱等問題，所以要諮詢公眾、政府各部門及唔同持份者，所需時間比預期耐咗。佢哋預計兩條條例草案會喺今個立法年度內提交立法會。
影響行政立法關係
另外，律政司同民政事務局都各欠交一項嘅功課，兩司局都話，因為要諮詢持份者意見，同埋條例草案牽涉眾多複雜細節，所以要順延至下半年度提交咁話。
之不過下半年待審草案原本已有十七項，若加埋上半年遲交嘅「功課」，再計埋因財政預算案而新增嘅兩條條例草案，合共超過廿幾份草案，勢必令立法會審議工作大塞車。湯家驊就話，餘下四個月要處理廿幾條條例草案，仲要因為北京兩會、公眾假期、財政預算案辯論同拉布而少咗開會時間，真係令人好擔心。政府遲交功課，唔止影響法例審議質素，仲會影響行政立法關係。其實政府呢個惡習已經持續多年，真係死性不改。