政情：中環出更：卸任政協 留港行善搞盆菜宴
全國人大政協「兩會」喺北京正舉行得如火如荼，今屆已卸任政協嘅立法會議員蔣麗芸（阿Ann），唔使好似以前咁長時間留京開會，所以就留港搵啲節目趁熱鬧。早兩日佢有份舉辦「長幼共融盆菜宴」，仲特登約埋同樣已卸任政協嘅「美容教主」鄭明明做善事添！
與深水埗街坊同樂
阿Ann話，佢一早已經想喺深水埗搞啲活動，同區內居民齊歡樂，後來諗到搞盆菜宴，咪試吓搵鄭明明等婦女界友好幫手贊助，結果大家一聽到呢個建議就好爽快應承。當日筵開二百圍，合共有二千幾人參加，場面好熱鬧。卓妮睇番阿Ann放上社交網站嘅活動相，見佢抱住一名好得意嘅BB仔，仲笑到見牙唔見眼，確係好開心。
阿Ann話，由於居民反應熱烈，所以希望年年都舉辦一次。佢又自爆所屬嘅民建聯稍後會舉行籌款晚會，其中香港婦女聯合協進會主席林貝聿嘉有份買枱支持，趁機大讚婦女界朋友一直好幫手喎！
卓妮