功夫茶經常強調，有麝自然香，好嘢自然多人欣賞，真係冇講錯。呢嗱，東方報業集團旗艦網站「on.cc東網」內容豐富，多姿多采，受到網民熱烈歡迎，尤其係全球免費開放《東方日報電子報》後，世界各地華人爭相瀏覽，而東網港澳版嘅瀏覽量亦節節上升，過去七日瀏覽頁次突破一億一千萬，再創新高，簡直係氣勢如虹！
即係咁，今年適逢東方報業集團四十五周年報慶，為回饋讀者，東網繼早前全球免費開放《太陽報電子報》及《好報電子報》後，本月一日起又全球免費開放《東方日報電子報》一個月，結果一如所料，網民反應空前熱烈，點擊率直線飆升。
過去七日，東網港澳網版嘅瀏覽頁次突破一億一千萬，「東網港澳」Android版App嘅單日安裝亦創下單日新高，較二月份平均數字多近四成。至於東方電子刊物嘅總瀏覽量同樣驕人，由三月一日至昨日傍晚六時，瀏覽頁次已超過一千七百萬。就以三月二日星期日計，手機版全日瀏覽頁次較對上星期日增加兩倍，三月三日更加較對上星期一急增兩倍半添。如果唔係蘋果產品審批緩慢，iPhone等iOS用戶仍未能更新「東網電子刊物」App，瀏覽量必定更多更踴躍。
東網包羅萬有，電子報固然大受歡迎，而本月一日推出嘅簡體字版東網大陸網站，以及「東網大陸」Android版App同樣大獲各界好評。東網大陸網站創本港傳媒先河，為內地讀者提供最快、最多、最貼身嘅新聞資訊同評論分析，瀏覽量屢創新高，證明內地讀者有眼光。
當然喇，群眾眼睛雪亮，有眼光嘅又點止內地讀者吖。呢，依家正召開全國兩會，港區人大代表及政協委員齊集北京，東網自然成為佢哋嘅首選。正如全國政協委員林健鋒話齋，自己身處北京開會，每日有大量新聞資訊需要吸收，為求喺短時間內洞悉中、港大小事情，每朝起床梳洗後第一件事就係透過手機內嘅東網瀏覽新聞。東網資訊又快又多又詳細，成為林健鋒最喜歡瀏覽嘅新聞網站，「睇東網可以將香港所有事知得一清二楚，東網係very good。」而另一位全國政協委員張華峰就話兩會期間應酬多，自己最鍾意茶餘飯後瀏覽東網，「報道好詳細，唔睇唔得。」
嗱，呢啲咪叫口碑囉。連法國前總統薩爾科齊政府嘅亞洲事務專員何福基亦讚不絕口，形容東網及《東方日報電子報》造福海外華人，令佢哋得益不少。冇錯嘞，東網立足香港，面向全球，致力打造華人最強資訊網，絕對唔係齋噏！
總而言之，讀者嘅支持，就係我哋嘅動力，功夫茶除咗要再次講聲「多謝」，仲應承大家，東網一定會精益求精，做到最好！