政情：何偉權夥商會 助更生者搵工
勞工市場蓬勃，唔少僱主大嘆有工冇人做。商界助更生委員會執行主席何偉權（Ken）就計劃聯同中華廠商聯合會，喺暑假舉行獄中招聘會，助釋囚人士搵工，預計有超過一百份筍工，部分薪酬高達一萬五千至一萬六千港元。佢稍後仲會考慮構建一個網上搵工平台或搵工諮詢中心，方便僱主招聘同釋囚就業。
搞獄中招聘會 過百筍工
阿Ken早前出席喺赤柱監獄舉行嘅證書頒發典禮，見證逾百位在囚人士順利完成各類學業課程及公開考試，有部分人寒窗苦讀幾年，終獲大學學位，場面感人。不過，釋囚出獄後搵份好工先係最實際，所以阿Ken早前搵商界領袖密斟搞招聘會，職位將包括餐飲及建築業，種類豐富。
商界極需要紮鐵、五金、木工及大廚等人才，若釋囚能接受有關技術訓練，搵工勝算大增，懲教署話會因應市場需要，度身訂造訓練課程。講到搵工貼士，阿Ken教路話：「最緊要有自信，唔好自卑。」佢話唔少釋囚未能放低曾入獄嘅包袱，見工時頭耷耷，唔敢正視別人，呢個係見工大忌喎。