政情：公文袋冇人難換當家

亂噏死撐 湯家驊面懵懵

立法會議員湯家驊（Ronny）尋日同傳媒敍會時話，黨魁梁家傑已經做咗近四年，聲稱黨章講到明，黨魁只可以連任一屆，所以今年十月改選，點都要退下火線。由於黨魁一職規定要由直選議員擔任，佢就點評話，環顧咁多個直選議員，首先佢無意做黨魁，而毛孟靜同佢一樣都係「異見人士」，所以冇乜機會，剩番低就係郭家麒同陳家洛，似乎陳家洛睇高一線喎。

不過，我哋問番公文袋，原來該黨早喺○八年已經更改咗黨章，所有職位都可以連任多屆，而據了解，梁家傑仲未有退意喎。唔知Ronny真係大頭蝦唔記得咗修章，定係佢心底唔多鍾意梁家傑呢？不過，佢唔記得又有乜咁出奇吖，好似之前佢有寓所被揭僭建玻璃屋，佢一度死撐話玻璃屋屬豁免規管類別，但最後都面懵懵話自己「記錯」案例。

另外，Ronny又左右開弓，批評泛民政黨同政府似乎都未能夠準確分析政治形勢，其中泛民浪費咗好多時間喺公民提名，而政府就太遲反駁。

批泛民搞「公提」嘥時間

當年佢代表過普選聯入過中聯辦，又對現時真普選好悲觀，既冇談判小組準備談判，唔少黨派開會仲要派助理出席，好多事又被佔中做咗。照佢咁講法，睇嚟真普選聯盟解散只係時間問題。

之前佢想各個泛民黨派單獨同中聯辦見面，佢就好坦白咁講，如果泛民一齊見面，有人怕到時有人被抬走就傾唔成，倒不如各個政黨各自表述，到時黨派轉軚都有下台階。佢又希望最遲五月可以見面，趁特區政府向中央呈交政改報告前未定調，仲有談判空間喎。