中環出更：林卓廷被告密入廉署做「間諜」
「貪湯」前廉政專員湯顯明被踢爆連串貪腐醜聞，曾任廉政公署調查主任嘅白鴿黨總幹事林卓廷就經常公開批評貪湯敗壞廉署名聲、打爛香港廉潔嘅金漆招牌。點知尋日該黨就收到匿名郵件，當中有封信件話林卓廷係「間諜」，潛伏喺廉署係為咗對付貪湯咁話。林卓廷睇完封信之後都得啖笑，仲話橋段勁過電影《寒戰》喎！
話說尋日白鴿黨收到一封寄畀該黨立法會議員單仲偕嘅郵件，入面除咗有一堆剪報之外，仲有一篇手寫信件大鬧林卓廷係「美英恐怖大間諜」，為咗「徹底消滅」貪湯，所以特登潛伏入廉署做調查主任咁話。信件又貼咗林卓廷喺記者會批評貪湯嘅照片，仲喺相上寫住「射殺」兩個字，有恐嚇之嫌。
林卓廷話，如果佢係臥底都好叻，可以預先知道貪湯嘅貪腐醜聞，再過五關斬六將咁考入廉署，仲要喺廉署入面隱藏身份，等離開廉署後先至爆大鑊，話橋段仲勁過警匪片喎。老實講，貪湯嘅貪腐醜聞係自作孽，表面上已經係證據確鑿，貪得咁低莊，就算冇人爆料，佢自己都會露出狐狸尾巴啦！
卓妮