中環出更：邱德根天倫樂三代同食雪糕
百仁基金成員邱詠麒（Josephine）一向都係乖乖女，卓妮早前就見佢同家人陪爺爺邱德根去中環ifc食午飯，食完飯後仲去雪糕店食甜品，佢同細佬邱華瑋（Andrew）全程對爺爺呵護備至，盡顯孝心同溫情一面。
當日下午兩點幾鐘，卓妮途經中環ifc時遇到富商邱德根同兒子邱達昌及孫仔Andrew行商場，當時邱達昌同Andrew一人一邊翹住邱德根手臂並肩而行，原來佢哋啱啱食完飯散步，並準備行去食雪糕。
與囝囝一杯兩份分
咁Josephine去咗邊呢？唔通咁快就趕下場約會？原來佢係分頭去雪糕店搵定位先。
當邱德根到雪糕店坐低後，Josephine就同細佬去買雪糕，最後買咗三杯雪糕，佢哋分別一人一杯，而邱德根可能唔食得太多凍嘢，所以就同達昌兩父子分甘同味喇。
達昌畀爸爸食先，但啲雪糕溶得好快，邱德根食食吓唔小心滴咗一滴落件衫度，Andrew一見到，就即刻好緊張搵紙巾幫爺爺抹乾淨，仲拎咗條圍巾幫佢圍住個領口位添，真係孝順又體貼，難怪爺爺都忍唔住會心微笑啦。
卓妮見邱德根食咗兩啖過足口癮後，就將杯雪糕交畀達昌品嘗，四人一邊食一邊傾偈，盡享天倫之樂，過咗一陣後就送老人家到樓下坐車離開。依家Josephine同Andrew兩姊弟都係幫緊家族打理地產生意，各有所長，相信爺爺真係飲得杯落喇。
卓妮