一個盲人帶住另一個盲人行山，會有乜後果呢？唔使問阿貴，後果梗係不堪設想喇，瞎子走路本身已經盲盲摸摸，點知帶路嘅居然係另一個橫衝直撞嘅失明人士，就算唔跌到粉身碎骨，都隨時跌到四腳朝天喇。
好嘞，既然瞎子領瞎子後果堪虞，咁失明財爺被一個盲摸摸嘅財經智囊牽住鼻子走，係咪唔使問都知將會下場慘淡吖？鬍鬚曾最新一份財政預算案一無是處，「大條歪理」派糖「減甜」，惹嚟全城炮轟，但佢死撐係參考咗長遠財政計劃工作小組嘅意見喎。嗱，長財組尋日正式發表報告，為財爺背書，點知又係「狼來了」嗰套，既無新意，更無灼見，你話係咪問道於盲，誤入歧途吖！
長財組報告係咁講嘅，估計港府未來嘅開支趨勢增長率為百分之五點三，而收入增長率則為百分之四點五，因而推測最快十年內將出現結構性赤字，再喺往後十年內用盡財政儲備。嗱，佢哋唔止將港府財政描繪成世界末日咁款，仲提出多項縮骨建議，包括控制開支增長、嚴守收回成本及用者自付原則，同埋設立未來基金等等。長財組報告充斥艱澀難明嘅財經數據，其實結論一字咁「錢」，就係叫港府閂水喉。
正所謂，官僚靠得住，豬乸會上樹。唔知大家點諗，功夫茶就覺得呢份所謂嘅長遠財政計劃工作報告極度靠唔住。一來，香港財政一向非常健全，庫房更年年水浸，話擔心財赤根本係欺人之談；二來咯喎，預算案年年估錯數，而且係錯到離晒大譜嗰隻，港產官僚連一年後嘅收支狀況都預算唔準，家陣話預測未來十年甚至二十年嘅財政狀況喎，咪怪功夫茶率直，收皮喇！
小組報告仲有一個盲點，就係睇唔到還富於民嘅財富效應。大家不妨諗吓，將庫房上鎖大閂水喉，任由公帑鎖喺庫房發霉，年年貶值，年年縮水，咁至係浪費公帑吖。鬍鬚曾唔識利用儲備為香港投資未來，反而學蠶蟲師爺諗縮數，推卸責任，難怪前行政會議成員林奮強亦睇唔過眼，炮轟新一份預算案欠缺亮點，令人失望。
不過話時話，鬍鬚曾繼續做守財奴，搞到預算案刻薄寡恩天怒人怨，未必係受小組報告誤導，隨時因果倒轉，係佢日思夜想炮製減甜預算案，所以下令搞出一份慳家報告，為佢漠視民困搵遮醜布就真。呢，小組組長謝曼怡係官僚出身，同鬍鬚曾同一個鼻孔出氣，小組報告有幾大說服力，都唔使多講喇，吓話。
孔夫子話齋，巧言令色鮮矣仁。鬍鬚曾漠視民困，拒絕開倉濟民，卻搬出大條歪理，諸多藉口，簡直係侮辱市民嘅智慧，慳啲喇。