睇本報「政情」版，圖文抵死，搞笑得來，其實幾有啟思。呢，好似「茅台博士貪湯厚顏赴兩會」咁，使人深感世事難料，好醜難辨。貪湯明明醜聞纏身，涉嫌利益衝突嘅衰嘢爆極都有，果真是林子大了──甚麼鳥都有，家陣係醜聞多了，乜嘢想不到的利益輸送都有！
之不過咁，開講都有話債多不愁，蝨多不癢，貪湯對醜聞亦然，佢都一味「清者自清」，視醜聞如無物；日前大搖大擺搭飛機去北京出席兩會會議，慌死人唔記得佢舊年撈咗個「全國政協」嘅銜頭，個篋仲掛住了「湯顯明博士」嘅名牌，認真卡士！
講真，人心不古，於今為烈；內地老人家成日詐摔倒，待有好心人扶起身就反咬人一大啖，話人哋推跌佢要求賠湯藥費，於是內地就有所謂「不是老人變壞了，而是壞人變老了」之嘆；老朽見貪湯風騷出席兩會，亦不禁興起：「不是好人變壞了，而是壞人變好了！」貪湯以待罪之身，竟春風滿面出席冠蓋滿京華嘅兩會，斷估咁多知名大人物同國家領導人在場，若然貪湯「與有榮焉」可以同枱食飯，一齊開會共商國事，睇怕就算以前係壞人，依家都變好咗喇！
再講，貪湯長袖善舞，擅飲酒交際應酬；以前啲大軍閥如張宗昌，飲到癲時，都會詩興大發，更曾即席吟詩：好個蓬萊閣，他媽真不錯，神仙能到得，俺也坐一坐。靠窗擺下酒，對海唱軍歌，來來划幾拳，舅子怕喝多！
以貪湯千杯不醉、萬杯不倒喝慣茅台嘅酒量，對海唱軍歌之餘，若然呢位由中國人民大學授予嘅「刑法學博士」，能夠為一眾政協、高官即席講吓「如何知法犯法而不會被繩之於法」，咁佢個「博士」，大家不必估其含金量有幾多，如此貪得盡興、逍遙，呢個「刑法學博士」確係實至名歸。比起貪曾，佢都算青出於藍而勝於藍也。