政情：陳湛全拍拖睇冰上賽馬
荃灣區議會主席陳耀星囝囝、香港馬主協會會長陳湛全（Charles）早前同太太及一班馬主遠赴瑞士睇冰上賽馬，點知賽事因天氣惡劣而中途腰斬，幸好呢個賽事嘅歷史已有成個世紀咁耐，早已發展到好似大型嘉年華咁，即使冇咗賽馬，仲有美酒佳餚、音樂表演同展覽，唔怕觀眾悶親。
Charles話，每年大約二月，當地嘅聖莫里茨湖就會結冰幾個星期，於是趁機喺湖面上舉行賽馬，至今已有近百年歷史。Charles話，佢第一次喺遍地白雪嘅夢幻環境下，觀賞名駒馳騁嘅英姿。佢又話，出賽騎師嘅「落馬」方式好新穎，喺馬匹衝線一刻，全部騎師一齊飛墮落地。後來佢先知，原來係因為風雪太大，雪地啜住馬蹄，導致騎師跌咗落地啫！由於當日天氣太惡劣，賽事只進行一場就被迫腰斬，結果幫手睇住啲手袋嘅陳太錯過第一場後就冇得睇，惟有明年再嚟過。