政情：中環出更：錯過專車 政協遭冷待
全國政協會議尋日下午正式開幕，但卻出現些少混亂。話說接載政協委員到人民大會堂嘅專車今年提早開出，由往年下午二時半改至二時十五分開出，部分委員懷疑未有收到有關通知而錯過咗專車，政協常委林樹哲同政協蔡冠深仲因為咁而遭到冷待添。
稱冇收到提早開出通知
尋日大約二時二十分左右，林樹哲同蔡冠深到達酒店門外等候專車，點知去到嘅時候先知原來架車已經走咗，林、蔡兩人急到似熱鍋上嘅螞蟻。不過職員就有眼不識泰山，態度欠佳咁同佢哋講，一早講咗一分鐘都唔遲得喇！林、蔡兩人就同佢理論，話根本冇收到專車會提早十五分鐘開出嘅消息。心急趕赴會場嘅蔡冠深即時諗住步行過去，仲話自己行得好快脆。
後來職員可能知道林、蔡二人嘅身份，最終都係安排兩架專車送佢哋去會場，林先鬆口氣，企埋一邊食支煙當壓驚。
卓妮