天花滲水兩年 戶主煎熬
天花滲水解決無期，小市民慘被部門「當波踢」！有西環居民兩年來飽受單位天花滲水困擾，負責跟進的滲水辦卻「十問九唔應」，經多番擾攘才證實上層單位食水管破損，故轉介至水務署跟進，水務署卻拒絕承認滲水辦的測試結果而令事件膠着，直至本報轉介後各部門才急急「補鑊」。立法會議員狠批涉事部門不負責任，要求交代有關事件。
「不停有水滴落嚟，有日仲有成塊廁所板咁大嘅石屎跌咗落嚟，你都咪話唔驚！」黃先生居於西環士美菲路，約於十年前發現單位廁所天花滲水及有石屎剝落，經上層單位維修後已停止滲漏。
天花發霉 露8吋鋼筋
及至兩年前再度出現滲水，不但整個天花有發霉情況，水珠與石屎更不停掉下，並露出逾八吋長鋼筋。黃指最嚴重時每晚均需拆除假天花傾倒積水，更時刻擔心被石屎擊中。
黃先生指出，當再次發現滲水時，已即時向由食物環境衞生署與屋宇署組成的聯合辦事處求助，惟對方卻採取「唔問就唔覆」態度，「上嚟睇咗一次就冇晒影，我等咗十個月再打去問，佢哋先話搵唔到樓上單位業主，跟住再過咗九個月先話係樓上條食水喉有問題，要轉介去水務署！」
不過，黃其後一直未有接獲水務署回覆，「今年一月我再問番滲水辦，佢哋先同我講，話原來水務署喺舊年十月已經覆咗佢哋話唔同意個測試結果，所以佢哋冇嘢跟到，叫我自己解決！」
滲水辦發言人承認，二○一二年十二月已接獲上述投訴，惟跟進五個多月仍未能確定滲水源頭，及至顧問公司進行連串測試後，始發現上層單位食水供水喉管破損，懷疑為滲水源頭，所以將個案轉交水務署跟進。
本報介入才發維修通知
至於水務署發言人則說，去年九月曾接獲滲水辦提供的測試報告，經研究後認為有必要再重新審視滲水辦的測試結果。然而，發言人又稱，日前已向涉事上層單位發出通知書，要求維修滲漏喉管，並承諾會繼續跟進個案直至維修完成。
「根本就係幾個部門喺度互相卸責，如果唔係，點解市民投訴足兩年都解決唔到問題，係都要傳媒轉介先即刻搞得掂？」立法會議員陳恒鑌狠批各部門均視滲水個案為燙手山芋，做法極不負責任，完全無視受單位滲水影響市民的苦況，甚至有機會危及生命財產安全，要求各部門就事件作清晰交代。
記者：何穎賢