先同各位講個古仔，話說有個老闆賺咗大錢，夥計猛呻舖頭包伙食飯餸太少食唔飽，要求加料，佢窒番轉頭話，加乜鬼吖，人工舖租燈油火蠟樣樣升，再過七年連飯都冇得開嘞，食自己喇！
大家一定估到，呢個孤寒財主就係財政司司長曾俊華嘞。啱啱發表嘅財政預算案，除咗一次性「派糖」措施大減之外，又取消電費補貼，連差餉及公屋租金補貼都畀佢削減一半。基層市民生活百上加斤，中產更加徹底失望。
最離譜就係，鬍鬚曾除咗孤寒仲鬼咁蠱惑，大幅「減甜」之餘又大玩狼來了。佢喺預算案搬出「長遠財政計劃工作小組」研究結果，警告如果政府喺教育、社會福利同醫療範疇每年有百分之三開支增長，本港最快七年後出現結構性赤字咁話。鬍鬚曾連當年預算同實際收支都相差十萬八千里，仲扮半仙預測若干年後嘅經濟，你話係咪搞笑吖。
呢，有中產就批評得啱嘞，鬍鬚曾嘅預算案年年估錯數，呢個財政年度又係由赤字變盈餘，所謂財赤警告其實係「想閂定後門，叫市民未來對派糖唔好有期望」嘅咋。
炳得好！呢個財爺簡直不知所謂！呢頭話港府面臨結構性財赤危機，嗰頭又話香港未來二、三十年經濟發展勢頭不俗，政府收入穩定，可以維持現行政策開支，神係佢，鬼又係佢，自相矛盾，邏輯混亂。不過市民冇咁易中招嘅，鬍鬚曾啲蠱惑，一眼就睇穿喇。
「東方報業民意調查」結果顯示，四成三受訪市民表示，對預算案非常唔滿意；話唔滿意嘅有近三成，即係反對市民佔大多數，而對於預算案將同市民生活息息相關嘅派糖開支大減四成，四成一受訪市民直指減甜幅度太大；兩成八認為紓困力度不足；兩成二批評當局忽略關顧基層。評價低成咁，連小學生都睇得出，鬍鬚曾呢鋪又「肥佬」喇。
家陣香港官富民窮，「減甜」首當其衝嘅就係基層市民。呢，尋日就有社福團體操去政府總部示威，抗議預算案向財團傾斜，未提出長遠措施應付人口老化，缺乏協助基層措施，亦無重新分配社會財富嘅方案，基層心聲鬍鬚曾聽到未呀？
唉，鬍鬚曾梗係借咗聾耳陳隻耳喇。佢嘅所謂理財哲學，來來去去都係「守財奴」三粒字。市民唔係反對審慎理財，亦唔係要香港學澳門咁年年派錢，而係不滿鬍鬚曾守着七千幾億元財政儲備仲大嗌狼來了，用「結構性財赤」嚟呃神騙鬼。民調又顯示，對於鬍鬚曾揚言政府最快七年後可能出現結構性財赤，建議增加部門收費，五成受訪者擔心生活百上加斤；兩成一質疑佢又玩狼來了把戲。
一句講晒，呢份「歷來最惡劣嘅預算案」唔止令市民失望，直頭係香港之恥，難怪有立法會議員揚言審議預算案時會拉布。鬍鬚曾一於繼續恐嚇，又話如果六月前預算案不獲通過，公共服務將無法維持喎。唔使玩卸膊嘞，計功夫茶話齋，如果真係不幸搞成咁，鬍鬚曾都係第一罪人嘅咋。