貪湯專委會上周六舉行最後一場公開聆訊；貪盡京港「奧」嘅前廉政專員湯顯明，依然堅挺其無恥無敵嘅厚黑學本色，除了扮失憶，對其在任時被揭豪花公帑宴請外國駐港領事，並由外交部駐港特派員公署派出五名大廚，到廉署北角總部餐廳烹調名貴美食，燈紅酒綠，又唱又飲，極盡視聽之娛，貪湯死撐晚宴是在「陽光下進行」。
堂堂一個北角廉署總部，使唔使搞到好似花都夜總會咁呢？當然，若然在卡拉OK高歌《你把我灌醉》之際，啤酒競飲大賽進行之時，有索模鋼管舞在閃燈下進行，咁一眾領事及外交部駐港特派員必定更切實體驗到「香港勝在有你和ICAC」嘅真正精神！香港呢個「動感之都」，唔係淨係日日示威、隔日遊行！
如此說來，貪湯此次之豪華夜宴人均酬酢雖超支一點六倍，以及傳聞總值逾三萬元嘅晚宴食材等，實在花得十分有意義！不是嗎？「我心未酬人亦樂（去唔成馬會送贈嘅京奧門票），廉署處處有歡顏」！貪湯明明玩忽職守卻依然覺得「清者自清」，廉署夜宴明明違規違例依然厚黑話「陽光下進行」；廉署喺佢主政期間變「奢侈」；而歷史告訴大家，奢侈競尚，腐化隨之，內地官場多如牛毛的版本可證之！
王夫之《讀通鑑論》嘗言：「唐自立國以來，競為奢侈，以衣裘僕馬亭榭歌舞相尚，而形之詩歌論記者，誇大言之，而不以為怍。韓愈氏自詡以知堯、舜、孔、孟之傳者，而戚戚送窮，淫詞不忌，則人心士氣概可知矣。」
貪湯不知羞恥為何物，豪花公帑依然厚顏大吹特吹「冇違紀」；把「廉署」變「奢侈」，而不知奢侈若成風，盛求財之慾而失其道，濫權者貪污橫行，勢所必然；香港廉署成立四十年，一朝道行，殊不知就毀在「清者自清」嘅貪湯那副乞人憎嘅嘴臉上！