議員中惡搞電郵
話說預算案宣讀前一晚，有個政商界嘅猛人飯局，席間其中一位立法會議員喺食食吓飯嘅時候，突然收到一個電郵，佢不以為意打開一睇，原來係啲惡搞電郵，啲靚女性感照即刻係咁彈晒出嚟，大家喺隔籬睇到都忍唔住「嘩」一聲。
在場嘅前商務及經濟發展局局長馬時亨（肥亨）仲開玩笑話：「好在係依家見到咋，如果係聽日（財政預算案當日）喺會議廳見到就大鑊喇」，佢仲不忘溫馨提示大家，如果醒目嘅就唔好喺開會嘅時候睇電郵喇。
勢估唔到翌日真係爆出何俊仁喺立法會開會期間睇艷照嘅事，今次肥亨真係開口中，咁都畀佢預知到！