政情：李世傑B女 像嫲嫲甜「美」
前保良局主席李張慧美再抱孫，孫女李嘉穎（Emma）趕及喺農曆新年前出世，親友利是如雪花般飛至。B女的爸爸李世傑（Eric）話，會將逾萬元的利是錢儲起，留待囡囡長大讀書用。
大食又精靈
出世六磅六安士嘅Emma，鼻子高高，似足嫲嫲。李太喺個孫女出世後，隔日就去睇佢，作為嫲嫲，當然甜到漏。講到改名，Eric坦言曾請教高人，夾過八字後敲定嘉穎呢個名。首次入產房迎接新生命，Eric親手剪臍帶，估唔到一剪就掂，囡囡的額形最似佢喎。Emma好乖巧，夜晚好少喊，非常易湊。Eric直言湊女經驗唔多，全靠陪月「過招」，幸好三扒兩撥下已學識餵奶同換片。出世無耐嘅Emma，胃口極佳，每日食七次奶，體重快速增磅，好精靈。
有女萬事足，Eric話會再追多幾個，但唔急於三年抱兩，心願係生夠兩至三個小朋友，事關大家族，開心啲喎。