政情：啟剛將卸任菁英會副主席？
菁英會副主席霍啟剛（Kenneth）去年好事成雙，不但同太太郭晶晶誕下麟兒，仲「升呢」做香港青年聯會（青聯）主席。不過，據知青聯內部有感Kenneth坐正後工作量大增，加上剛為人父嘅Kenneth亦要花唔少心力照顧家庭，所以Kenneth為免顧此失彼，大有可能七月後卸任菁英會副主席一職，唔知空缺會改由邊個頂上呢？我哋問過該會主席梁宏正，但佢就話未有傾過呢方面嘅消息。
講開菁英會，原來佢哋正聯同百仁基金、青年聯會等約十九個青年團體，密鑼緊鼓籌備緊一個叫香港各界青少年活動委員會嘅新組織，並由青聯前主席陳仲尼擔任執委會主席，會唔會順勢重新宣傳國民教育就不得而知，日內會有公布喇。
挑選學生赴博鰲論壇
另外，往年有份籌辦博鰲青年論壇（香港）嘅菁英會，亦打算趁博鰲論壇今年四月喺海南舉行，爭取從本地大專院校挑選二十個學生到當地參加義工工作，例如負責招待來賓等，機票酒店由菁英會同主辦單位包辦，希望帶領本地學生見識一下。